Mestreechse Verhaole

Wieker Broonk

Auteur(s): René Heckers

 Harie waor door ze zwaoger oetgenudeg um in Wiek nao de persessie te koume kieke. De Wieker Broonk woort wel neet mie gevierd wie vreuger, meh de persessie hadde ze in iere gehawwe.

Harie en ze zwaoger hadde ziech e good pläötske gezeuk op de Rechstraot. Dao kóste ze alles good zien. Um haaf twelf begós de persessie te trèkke. De persessie vaan 't Zwart Kruus vaan Wiek. Mèssendeenders, kräölkes, bruutsjes en aander kinder die get móste oetbeelde lepe mèt. Vlagge, veendels en beelde woorte mètgedrage. De hermenie in vol ornaat späölde häör sjoenste leedsjes en 't bestuur leep veurop in slippejas. 't Beeld vaan 't Zwart Kruus vaan Wiek woort gedrage door 'ne maan of tien. Iech kós 'rs e paar devaan. Die kaom iech wel ins tege in de kaffee vaan Math Devoux, Au Mouton Blanc, oonder 't drinke vaan e gleeske beer. In de kaffee waore ze nao de lèste mode gekleid en hadde ze 'n groete snoets es ze alderlei avonture vertèlde euver de vroului. Noe zaoge ze aanders oet. Noe hadde ze gein groete snoets, meh 'n oetgestreke snoets en hadde ze e laank kleid aon, zjus wie paoters.

 Wie Harie die lui allemaol zaog loupe, dach heer bij z'n eige 'Slivvenhier heet raar kosgengers'. Dao lepe koerezele mèt. Neet eine, meh drei! Veer zègke tege zoe'ne mins 'koerezel'. Meh in deftege kèrktaol neume ze zoe'ne maan 'suisse'. Boeveur ze in Wiek mèt drei koerezele veurop lepe waor Harie e raodsel. Nao 'n haaf oor waor de persessie langs en Harie wouw op hoes aon goon. Ze zwaoger zag : 'Kom, veer goon us eine drinke bij Kien tegeneuver de kèrk'. Op nao Kien dus. Harie had gedach in 'ne kaffee terech te koume boe e paar lui stoonte die get aon 't vertèlle waore oonder 't drinke vaan e gleeske beer. Niks vaan dat alles. 't Waor bij Kien hartstikke vol. Leen Mente späölde op häöre moneka en ze gaoven 'm op de vreuge mörge al flink gaas.

Harie wis neet wat heer zaog. 't Beer struimde langs alle kante op häöm aof. De persessie leep op 't ind. De kaffee laog rech tegeneuver de kèrk. De persessiegengers kaome zoe oet de persessie en lepe rechdoor de kaffee in. 't Woort wie langer wie voller. Harie kós e paar vaan die lui. Geer wèt wel, vaan die kerels wie de buim, mèt vaan die paoterskleier aon. Achterin de kaffee zaog heer e paar pluime bove de lui oetsteke. En jao, de drei koerezele hónge in 't peleton en gónge op de meziek vaan 'Zjeng aon de geng' op de sjouwers door de kaffee. Um drei oor voont Harie 't genóg gewees en leep mèt ze zwaoger nao boete. Dao drejde heer z'ch nog ins um en zag tege ze zwaoger :'Iech höb toch geliek gehad. Slivvenhier heet raar kosgengers'.

Afb 1: Soms lepe ze zellefs mèt veer koerezele veurop!
Afb 2: De 'persessie vaan 't Zwart Kruus vaan Wiek' trekt door de Rechtstraat, 1938


De verhalen:
't Gaasmenneke, Bruudsje Stols, D'n doevemèlker, D'n Tamboermaître, De Benanebókser, De boontjas vaan Harie z'n mam, De Kloniaal, De mins vaan 't Leger des Heils, De roej Tina, Harie de poompemeker, Keersgratificatie, Peerdsvleis, Rieka vaan de frituur, Sjink,

Terug naar het verhalenoverzicht