Mestreechse Verhaole

Sjink

Auteur(s): René Heckers

Kint Geer häöm nog? Sjink, de pelisie? Sjink, d'n einegste pelisie boe ze oets e vastelaovendsleedsje euver gemaak höbbe. Dat góng zoe : 'Sjink, dee sjieke Sjink. Dee sympetieke'. Sjink regelde gans allein 't verkier vaan Mestreech. Heer gaof noets e perses, meh es heer op z'n fluit blaosde, stoont ederein stief vaan de sjrik en daan luusterde ze allemaol wie e vinkske.



E paar daog veur Keersmes stoont Sjink op d'n hook vaan de Vriethof 't verkier te regele. Dat zaot moervas. 't Leep veur geine meter. Fluite, sjriewe en keke. 't Holp allemaol neet. 't Zaot al d'n hielen daag tege, voont Sjink. 'n Mam mèt häöre zoon staok de straot euver en de jong leep nao Sjink touw. 'Menier', zag heer, 'maag iech Uuch ezzebleef get vraoge?' 'Evekes wachte, m'ne jong', zag Sjink. 'Zo, noe vertèl mer ins wat tiech op d'ne maog ligk'. 'Menier', zag de jong, 'miene pap is thoes weggegaange en is neet mie trökgekoume. Mien mam heet dao hiel väöl verdreet vaan. Kint Geer neet zörge tot heer trök nao hoes kump? Ze höbbe miech vertèld 'Sjink kint alles', dus moot Geer dat ouch kinne'.

Iers wouw Sjink zègke : 'Miene jong, iech höb allein verstand vaan oto's'. Meh dat kós heer dat joonk neet aondoen. Heer zag toen mer : 'Iech gaon 'm veur diech zeuke en es iech häöm tegekom, zègk iech tege häöm tot heer nao hoes moot koume'.

Mèt Keersmes góng Sjink mèt z'n vrouw en dochter nao de nachmès. Aon d'n euverkant lepe lui die häöm bekind veurkaome. 'ne Maan mèt z'n vrouw en in 't midde 'ne jong. Dee jong heel hiel stief de hand vaan z'ne pa vas, ezzof heer bang waor tot dee mins zouw wegloupe. En inins veel 't kwartsje bij Sjink. Dat waor de ma mèt häöre jong vaan op de Vriethof, boe de pa vaan waor weggegaange. Noe wis heer 't weer.

De jong staok achter de rögk vaan z'ne pa 'nen doum op, ezzof heer wouw zègke : 'Dat is 'm. Heer is weer trök en dao höb Geer veur gezörg'. Oondaanks tot Sjink hielemaol niks aon dat geval gedoon had, kraog heer toch 'n hiel werm geveul vaan binne. Mèt nate ouge volgde heer de nachmès. D'n daag nao Keersmes stapde Sjink fluitentere op z'ne motor en góng weer aon ze pelisiewerk.

Afb 1: De voorganger van Sjink (rechtsonder) regelt het schaarse verkeer op het Vrijthof, anno 1933
Afb 2: In de jaren 1960 kon één enkele agent het verkeer nog vanaf de Wilhelminabrug de stad in loodsen
Afb 3: In de jaren 1950 had het verkeer het soms AL knap lastig in de smalle straatjes van de binnenstad


De verhalen:
't Gaasmenneke, Bruudsje Stols, D'n doevemèlker, D'n Tamboermaître, De Benanebókser, De boontjas vaan Harie z'n mam, De Kloniaal, De mins vaan 't Leger des Heils, De roej Tina, Harie de poompemeker, Keersgratificatie, Peerdsvleis, Rieka vaan de frituur, Wieker Broonk,

Terug naar het verhalenoverzicht