Mestreechse Verhaole

Rieka vaan de frituur

Auteur(s): René Heckers

Kint Geer häör nog? Rieka vaan de frituur op de Toongersestraot? Ze waor Italiaonse, meh ze hóng hiel erg aon eus keuningshoes. Tege 'ne maan mèt 'ne knievel zag ze altied : 'lelijke man'. Meh tege 'ne maan zoonder knievel zag ze : 'mooie man'.

'n Week veur Keersmes mós ze 's mörges um zès oor de drekbek boete zètte.Tege de moer vaan de frituur zaot 'ne mins op z'n huukskes te slaope. Door de sleeg vaan de deur woort de gooje mins wakker. 'Ikke Achmet', zag heer tege Rieka. Rieka, altied zakelek, meinde tot dee mins ach tute friet mèt mós höbbe. Rieka gaof häöm te ete, friet mèt zoer vleis. Ze had niks aanders. Op zolder voont ze 'n aw matras. Dao kós heer op slaope. E paar daog laank gaof Rieka häöm te ete en kós heer blieve slaope. Verstoon kós ze häöm neet. Heer waor gevlöch oet Irak en de taol die heer spraok, dao had Rieka geine kies vaan gegete. Ze voont dat hielemaol neet erg. Ze voont 't gans gewoen wat ze veur dee mins deeg. Ze volgde de weeg vaan häör hart. En obbins waor heer weg. Zoonder get te zègke en zoonder aofsjeid te numme. Op de toenbaank had heer e medaajeke gelag, mèt 't beeld vaan Allah. 't Medaajeke bleek vaan zuver goud te zien. Rieka heet dat medaajeke aon de pestoer vaan de Slevrouwekèrk gegeve. Dee heet 't neve 't beeld vaan Slevrouw aon de moer gehaange. Mèt Keersmes góng Rieka nao de nachmès. Wie ze 't medaajeke zaog, kraog ze 'n hiel werm geveul vaan binne. Häöre Keersmes kós neet mie kepot!

Afb 1: Rika Césarin, beroemd om haar frites en haar liefde voor het koningshuis, overleden in 2004


De verhalen:
't Gaasmenneke, Bruudsje Stols, D'n doevemèlker, D'n Tamboermaître, De Benanebókser, De boontjas vaan Harie z'n mam, De Kloniaal, De mins vaan 't Leger des Heils, De roej Tina, Harie de poompemeker, Keersgratificatie, Peerdsvleis, Sjink, Wieker Broonk,

Terug naar het verhalenoverzicht