Mestreechse Verhaole

Peerdsvleis

Auteur(s): René Heckers

't Waor in de oorlogsjaore. Dao waor haos niks en alles waor op de bon. Veural vleis waor zoe good es neet te kriege. De Pruse hadde alles veur ziechzelf nudeg en 't bitteke wat euverbleef kóste de Mestreechtenere ziech oonderein verdeile.

Langs de Maos, ter huugde vaan Heugem, woende e klein keuterbuurke. Fey hètde dee gooje mins. Heer had get land op d'n diek langs 't water, e peerd en get verkes. Heer kós zjus z'ne kop bove water hawwe, meh heer voolt ziech gelökkeg.

Op 'nen daag kaom heer aongerije mèt kaar en peerd, de kaar zwoer gelaoje mèt krote. Bovenop d'n diek mós Fey de kaar drejje en oonder 't drejje kaome de twie raajer vaan de kaar euver de rand vaan d'n diek en rolde de zwoer gelaoje kaar, mèt 't peerd nog ingespanne, d'n diek aof en zoe 't water in. De kaar en 't peerd gónge oonder en 't peerd verdroonk. Mèt maan en mach woorte nao verloup vaan tied de kaar en 't peerd op de kant getrokke. 't Peerd waor doed. Dao waor niks mie aon te doen. 't Woort bove op d'n diek neergelag, want d'n daag denao zouw eine vaan de verzekering nao 't kadaver koume loere um de sjaoj eventueel oet te betaole.

De volgenden daag kaom dee gooje mins bij Fey aonkloppe. Same gónge ze op weeg um nao 't doed peerd te goon kieke. Bij 't kadaver aongekoume, versjrókke ze ziech te barste. 't Peerd laog dao nog wel, meh 't waor neet mie compleet. Ze hadde z'n twie achterbatse aofgesnooje. Vaan 't peerd waor nog mer de hèlf euver.

Niemes kós antwoord geve op de vraog wee dat gedoon had. Niemes had get gehuurd. Niemes had get gezeen. Ei dink waor zeker. 't Stoonk de ganse week laank nao gebrooje peerdsvleis. Veural in 't Rutersträötsje, op de Hoegbrökstraot en in de Rechstraot. Die grappemekers zien allemaol doed. Eine devaan heet nog lang op Klevarie in 'ne rolstool gezete.

Afb 1: Hottot bàjke!
Afb 2: Zwaar beladen door de Pieterstraat


De verhalen:
't Gaasmenneke, Bruudsje Stols, D'n doevemèlker, D'n Tamboermaître, De Benanebókser, De boontjas vaan Harie z'n mam, De Kloniaal, De mins vaan 't Leger des Heils, De roej Tina, Harie de poompemeker, Keersgratificatie, Rieka vaan de frituur, Sjink, Wieker Broonk,

Terug naar het verhalenoverzicht