Mestreechse Verhaole

Keersgratificatie

Auteur(s): René Heckers

Iech kaom vaan de Mulo en mós goon wèrke. Iech begós es jongste bedeende op kentoer bij de Société-Céramique ofwel de Sjèremiek. Umtot iech nog gein 18 jaor waor, mós iech in de febrik aongesproke weure mèt 'jongenhier Heckers'. Mèt aander wäörd, iech waor beambte.

Veer zouwe veur d'n ierste kier 'n keersgratificatie kriege. Dat had euzen directeur, menier Miechel, veerdeg gekrege. En dat góng es volg. Ederein kraog twie gölde fiefteg, eins wie lang of heer of zie gewèrk had. Veur eder deensjaor fiefteg cent. D'n awwe Pow Raomeeckers wèrkde al twie en viefteg jaor op de Sjèremiek (vaan AOW had nog noets iemes gehuurd). Dee kraog dus twie en viefteg kier fiefteg cent, plus twie gölde fiefteg. Same is dat ach en twinteg gölde fiefteg. Iech kraog ouch 'n keersgratificatie. Iech wèrkde dao vaanaof september en zouw dus twie gölde fiefteg kriege. Vaan mien mam moch iech eine gölde daovaan veur miechzelf hawwe. Dat had miene pa good gevoonde.

's Mörges mós iech bij menier Sonneville (de kasseer) op kentoer koume. Dee lag miech hoonderd gölde op taofel en zag tege miech : 'Daan moot Geer hei teikene, jongenhier Heckers'. 'Meh menier Sonneville, iech kin neet trök geve. Iech verdeen mer daarteg gölde in de maond en de maond is bijnao um'. 'Niks trökgeve', zag menier Sonneville. 'Geer zeet beambte en die kriege allemaol hoonderd gölde'. 'Menier Sonneville', zag iech, 'dat vin iech neet ierlek. Pow Raomeeckers wèrk hei al twie en viefteg jaor en dee krijg mer ach en twinteg gölde fiefteg'. 'Jongenhier Heckers', zag menier Sonneville toen, 'Geer moot ins liere die groete klep vaan Uuch in bedwaank te hawwe, want aanders gaot Geer dao later hiel väöl en hiel dèks las vaan kriege'.

Wat hee dee gooje mins geliek gekrege!

Afb 1: Gezicht op de 'Sjèremiek', circa 1935
Afb 2: Arbeiders en beambten verlaten de fabriek


De verhalen:
't Gaasmenneke, Bruudsje Stols, D'n doevemèlker, D'n Tamboermaître, De Benanebókser, De boontjas vaan Harie z'n mam, De Kloniaal, De mins vaan 't Leger des Heils, De roej Tina, Harie de poompemeker, Peerdsvleis, Rieka vaan de frituur, Sjink, Wieker Broonk,

Terug naar het verhalenoverzicht