Mestreechse Verhaole

Harie de poompemeker

Auteur(s): René Heckers

Dit is e verhaol oet de kinderjaore vaan Harie de poompemeker. Harie waor jaoreg gewees. Heer waor vief jaor gewoorde. Veur z'ne verjaordaag had heer venalles gekrege. Zoe ouch e kleurbook mèt kleurpotloejer. Heer zaot altied gere op 't keuketäöfelke. Deze kier ouch. Mèt z'n tong oet z'ne moond waor heer 'ne prachtege clojn aon 't kleure. Z'n mam zaot neven 'm de gezèt te leze. Inins (niemes wis wie 't gebäörd waor) laog Harie op de groond. Heer had ziech flink pijn gedoon en z'n mam had ziech oonnuzel versjrókke. De sjerpe kant vaan 't potloed had heer in 't heukske vaan z'n oug gekrege. Ze geziech zaot hielemaol oonder 't blood.

Wie 'ne wervel vloge ze mèt Harie nao 't hospitaol. D'n dokter vroog wat gebäörd waor en z'n mam vertèlde wie 't waor gegaange. D'n dokter vroog of ze de punt vaan 't potloed gevoonde hadde. Es dat neet zoe waor, daan kós dee nog in 't oug zitte. Harie kraog twie hechtinge, 'n groete plaoster op z'n oug en ze kóste nao hoes.

Meh Harie z'n mam had gein rös in. Ze mós dee punt vaan 't potloed vinde. Mèt 'n zaklamp zeukde ze de ganse kokesmat aof. Meh begin mer ins de punt vaan e potloed in 'n kokesmat te vinde. Dat lökde vaan geine kant. Ten einde raod góng Harie z'n mam nao de kèrk. Nao d'n heilege Antonius vaan Padua. Es me get kwiet waor, brande de lui veur häöm 'ne boezjie, in d'n hoop trök te vinde wat ze kwiet waore. Meh Harie z'n mam góng wijer..

Sint Antonius waor vaan de paoters Franciscaone. Die droge altied brojn kleier. Ze zag tege 't beeld vaan Antonius : 'Iech bran hei 'ne boezjie. Help miech um dee punt vaan 't potloed te vinde. Es veer dee vinde, daan belaof iech Uuch tot m'ne zoon Harie tot en mèt z'n plechtege kemunie al z'n kleier in 't broen zal drage'.

En zoe gebäörde 't ouch. De punt vaan 't potloed woort gevoonde. Harie z'n mam heel ziech aon häör belofte. Tot z'n twelfde jaor droog heer allein mer broen. Broen oondergood, brojn (korte) brook, brojnen trieko, brojn sjeun en brojn kouse. Wie Harie e jaor of tien waor, vroog heer aon z'n mam : 'Wie kump 't toch tot ze miech op sjaol oetsjelle veur brojne paoter?' 'Nog twie jäörkes volhawwe, jong', zag z'n ma, 'daan vertèl iech dat geheim. Daan hoofste neet mie wakker te ligke'.

Op z'n twelfde kraog Harie 't gans verhaol te hure. Iech kin miech neet veurstèlle tot heer dao erg blij mèt waor. Ouch hei kin me weer rösteg stèlle : Slivvenhier heet raar kosgengers!

Afb 1: Hei brande Harie z'n mam 'ne boezjie
Afb 2: Een sportieve bruine pater


De verhalen:
't Gaasmenneke, Bruudsje Stols, D'n doevemèlker, D'n Tamboermaître, De Benanebókser, De boontjas vaan Harie z'n mam, De Kloniaal, De mins vaan 't Leger des Heils, De roej Tina, Keersgratificatie, Peerdsvleis, Rieka vaan de frituur, Sjink, Wieker Broonk,

Terug naar het verhalenoverzicht