Mestreechse Verhaole

D'n Tamboer

Auteur(s): René Heckers

Kint Geer häöm nog? De lange Lewie Lambriks? Geer wèt wel, d'n tamboer-maître vaan De Keuninkleke. Es heer veur de hermenie oetgóng, waor 't zjus of heer op de wolke leep. Heer leep ouch neet gewoen, meh heer dansde e bitteke op de maot vaan de meziek.

In de week veur Keersmes kaom Lewie mèt de hermenie de Helmstraot op. Ze kaome de keersmaan bringe, dee achter hun in 'n witte kojts zaot. Op de Vriethof aongekoume, späölde de hermenie e lekker stökske meziek en Lewie voolt ziech in z'n illemint. In z'n tes zaot e breefke vaan fiefteg gölde, gekrege vaan 'ne groete sponsor op de merret. Dee had gezag : 'Gaank t'ch nao aofloup mèt d'n vrun mer eine drinke in De Struys.'

Obbins zaog Lewie langs de kant e meidske stoon wat häöm bekind veurkaom. Ze had e kinneke op häören erm. Heer had häör 's mörges in de Groete Staat gezeen. Ze perbeerde de Dakloze Gezèt te verkoupe, meh die raakde ze aon de straotstein neet kwiet.

Zoonder wijer debij nao te dinke leep Lewie op 't meidske aof, froemelde häör 't breefke vaan fiefteg gölde in häör voes en stamelde zoeget es : 'Koup mer get lekkers te ete mèt de feesdaog veur diech en de keend'.

Langs 't Spaons Gouvernemint drejde de hermenie de Vriethof aof en 't waor zjus of de meziek die tege de hoezer opklaterde sjoender begós te klinke. Later, in De Struys, vertèlde Lewie aon de tamboers wat mèt de fiefteg gölde waor gebäörd. Die begóste spontaan te zinge : 'Zoe'ne gooje höbbe veer nog noets gehad'.

Afb 1: Louis Lambrix, tambour-maître vaan de Keuninkleke


De verhalen:
't Gaasmenneke, Bruudsje Stols, D'n doevemèlker, De Benanebókser, De boontjas vaan Harie z'n mam, De Kloniaal, De mins vaan 't Leger des Heils, De roej Tina, Harie de poompemeker, Keersgratificatie, Peerdsvleis, Rieka vaan de frituur, Sjink, Wieker Broonk,

Terug naar het verhalenoverzicht