Mestreechse Verhaole

D'n doevemèlker

Auteur(s): René Heckers

Harie had ze gans leve in 't Blauw Dörp gewoend. Had dao z'n kemunie gedoon, waor dao z'n leefste tegegekoume en waor ouch mèt dat meidske getrouwd. Z'n kinder waore dao gebore, ouch weer getrouwd en waore oetgevloge nao alle deile vaan Mestreech. Eine jong zelfs nao 't boeteland, nao Amerika.

En noe waor Harie in de Vut. Heer waor 40 jaor poompemeker gewees bij de bouwvereiniging en heer waor vervreug demèt mage oetsjeie. In 't begin, es heer ziech verveelde, sjikde Anna, z'n vrouw, häöm de straot op en zag tege häöm : 'Gaank mer get kemissies veur miech doen, want de löps miech hei veur de veu'. En daan wis heer neet boe heer 't mós zeuke. Vaan ermooj waor heer goon hardloupe. Geer wèt wel. Mèt e kort breukske aon en zoe'ne gekke band um z'ne kop. Meh heer voont tot heer veur joker leep en waor dao al gaw mèt oetgesjeid. Toen waor heer goon fietse. Heer had veur e paar tiensjes 'nen awwe renfiets op de kop kinne tikke. Meh op d'n doer begós heer z'n kneuk toch te veule. Toen waor heer dao ouch mer mèt gestop.

En noe had heer doeve. Doeve vaan 's mörges tot 's aoves. En es 'n douf kraank waor, bleef heer desnoeds ouch 's nachs op d'n doeveslaag. Anna had gei keend mie aon häöm. Heer waor altied bij de doeve en ammezeerde ziech köstelek. Es Anna neet op häöm reep, vergaot heer avventouw zelfs um te ete. Nein, Harie had z'nen hobby gevoonde.

Op 'ne gooje mörge mós heer nao 'ne collega-doevemèlker. Heer mós nao Jeu op de Ruttesingel. Harie had 'n kraanke douf en Jeu waor ouch e bitsje doevendokter. Dus...op nao Jeu. Doevekörf mèt de douf achter op de fiets en dao góng Harie. Bij Jeu aongekoume, zat heer de fiets tege de moer, neve de drekbaktute die aon de deur stoonte. Harie sloot de fiets aof. 'De kins noets wete', zag heer tege Jeu, 't is wel mer 'n aajd bieske, meh 't zouw zun zien es iech 'm kwiet waor'. Mèt d'n doevekörf gónge ze mèt hunnen twieje nao binne. Same fantaseerde Harie en Jeu euver de prijze die ze mèt hun doeve zouwe goon winne. Veurtot ze 't wiste, waor 't tied veur 't middagete.

Boete gekoume, loerde Harie nao z'ne fiets. Heer zaog 'm wel stoon, meh dee fiets zaog zoe raar oet. Dao zaote gein raajer mie oonder. Gans verpópzak keek heer nao Jeu, meh dee loerde ouch of heer oet 'n ei kaom. D'n euverbuurmaan, dee aon de deur stoont, vroog wat aon de hand waor. 'Jeh', zag Harie, 'ze höbbe miech de raajer vaan miene fiets getik'. 'Die zien neet getik', zag de buurmaan. 'Iech höb die raajer droonderoet gehaold. Iech meinde tot deen awwe fiets hei stoont veur mèt te geve aon d'n drekwage en iech mós twie raajer höbbe veur e keerke wat iech aon 't make bin veur miene kleinzoon. Iech dach 'Noe höb iech twie sjieke raajer veur 't keerke'. 'Niks aon de hand, jonges', zag d'n euverbuurmaan. 'Komp mer mèt nao d'n euverkant. Daan hole veer eve die twie raajer'. Achter in 't berghok vaan de buurmaan woort nog 'ne slaag gelache euver die raajer. Ze vertèlde z'ch nog 'n mop en toen gónge Harie en Jeu trök. Boete gekoume, zaoge ze nog zjus d'n drekwage d'n hook umdrejje. Achterop de wage hóng 'nen awwe fiets zoonder raajer.

Afb 1: Het ringen van de duiven in Café La Colombe, op de Markt (1950)
Afb 2: Gel Nètteke voort de doeve op 't Vriethof, 1968


De verhalen:
't Gaasmenneke, Bruudsje Stols, D'n Tamboermaître, De Benanebókser, De boontjas vaan Harie z'n mam, De Kloniaal, De mins vaan 't Leger des Heils, De roej Tina, Harie de poompemeker, Keersgratificatie, Peerdsvleis, Rieka vaan de frituur, Sjink, Wieker Broonk,

Terug naar het verhalenoverzicht