Mestreechse Verhaole
De mins vaan 't Leger des Heils
Auteur(s): René HeckersKint Geer häöm nog? Dee groete, blonne mins in dat uniform vaan 't Leger des Heils? Edere zaoterdag kaom heer op de fiets oet Brunssum nao Mestreech um hei alle kaffees aof te goon en te kollektere veur 't Leger. Heer had altied e lachend geziech en wouw noets get drinke, este häöm get wouws geve.
't Waor e paar daog veur Keersmes wie 't gebäörde boe hiel Mestreech al jaore bang veur waor. Heer kaom 's aovends laat oet 'ne kaffee, kraog e paar sleeg op z'ne kop en waor de kollektebös en de cent kwiet.
D'n daag veur Keersmes mós heer op 't pelisiebureau koume. Of heer mer 'n aonklach wouw indene. Ze hadde d'n dader gevoonde. 'Zeet Geer op eure kop gevalle?', zag de maan vaan 't Leger des Heils. Iech kollekteer al m'n hiel leve laank veur lui die in de maotsjappij e bitsje oontspoord zien en zouw iech daan noe tege zoe'ne mins 'n aonklach mote indene?' 'Iech zouw neet gere', zag heer en leep gifteg nao boete.
De knaap dee 't gedoon had stoont boete te wachte. 'Sjiek gedoon, menier, tot Geer gein aonklach höb ingedeend'. 'Niks sjiek', zag de maan vaan 't Leger. De hads miech neet op miene kop hove te houwe. Este 't gewoen aon miech hads gevraog, had iech tiech die cent ouch zoe wel gegeve.'. Iech wins tiech 'ne Zaolege Keersmes, meh bezörg miech estebleef m'n kollektebös trök'.
D'n daag nao Keersmes hóng bij häöm thoes aon de knóp vaan de deur 'n plastic tuut. In de tuut zaot de kollektebös en...'n haaf literke Eels.
De verhalen:
't Gaasmenneke, Bruudsje Stols, D'n doevemèlker, D'n Tamboermaître, De Benanebókser, De boontjas vaan Harie z'n mam, De Kloniaal, De roej Tina, Harie de poompemeker, Keersgratificatie, Peerdsvleis, Rieka vaan de frituur, Sjink, Wieker Broonk,
Terug naar het verhalenoverzicht